KOSA LA JINAI; MAELEZO NA UFA

KOSA LA JINAI; MAELEZO NA UFAFANUZI

Na Wakili Manace Ndoroma
Kosa la jinai ni tendo lolote ambalo limekatazwa kwa sheria, ambapo mtu yeyote
akilitenda anakuwa ameikosea Jamhuri. Katika makosa ya jinai, mlalamikaji anakuwa ni
Jamhuri, ikiwakilishwa na mwendesha mashitaka wa Serikali. Mtu binafisi aliyedhurika
kwa tendo la kijinai siye anayeshitaki mahakamani. Yeye anabakia kuwa ni shahidi tu,
na ni mara chache kwamba Mahakama inaweza kuagiza kulipwa fdia kwa mtu
aliyedhuriwa na tendo la kijinai.
Katika Makosa ya Jinai, mtu anayepatikana na hatia huadhibiwa, na anayeonekana
hana hatia huachiwa huru. Adhabu za makosa ya Jinai ni pamoja na: kuachiwa kwa
masharti, kifungo cha nje, faini, kifungo gerezani kwa muda maalum, kifungo cha
maisha na kunyongwa hadi kufa.
Makosa ya aina hii ni pamoja na wizi, mauaji, kumiliki silaha kinyume cha sheria,
ubakaji, kutozingatia sheria za barabarani, nk. Makosa yote ya Jinai sharti yawe
yameandikwa katika sheria mbalimbali. Hata hivyo, kwa nchi ya Tanzania, makosa
mengi ya Jinai yametajwa katika Kanuni ya Adhabu (Sura ya 16 ya Sheria za Tanzania).
Mtu anayefikishwa mahakamani kwa kosa la jinai huitwa mtuhumiwa kwa muda wote
baada ya kukamatwa, kupelekwa kituo cha polisi na hata wakati wa kujitetea
mahakamani. Akishapatikana na hatia huitwa mhalifu, na akiadhibiwa kwa kifungo
gerezani huitwa mfungwa.
Kimsingi, kosa lolote la jinai linakamilishwa na vitu viwili; tendo lenyewe lililokatazwa,
na nia ovu ya kutekeleza tendo hilo. Mahakama inaposikiliza shauri lolote la jinai
hutafuta kujiridhisha iwapo mambo yote hayo mawili yamethibitika kutokea. Katika
mchakato wa kuthibitisha mambo hayo upande wa mashitaka na ule wa utetezi
husikilizwa kwa makini, mashahidi huitwa mahakamani na wakati mwingine, ikibidi,
vidhibiti mbalimbali huwasilishwa mbele ya mahakama ili kuthibitisha kwamba kweli
tendo lililoharamishwa lilitokea, na aliyelitenda alifanya hivyo kwa makusudi
Ili Mahakama iweze kumtia hatiani mtuhumiwa sharti upande wa mashitaka uthibitishe,
bila kuacha shaka yoyote yenye mashiko, kwamba mtuhumiwa ametenda kosa ambalo
ametuhumiwa nalo. Ikishindikana kuthibitisha hivyo, mtuhumiwa huachwa huru. Katika
Jinai, hakuna vuguvugu wala baridi. Ni ama una hatia, au huna hatia.
Kama kosa fulani la jinai linakamilishwa na mambo matatu, ni sharti mambo yote
matatu yathibitike, Upande wa mas.

Kwa mfano, kosa la mauaji linafafanuliwa kuwa ni tendo la mtu mmoja kuondoa uhai
wa mtu mwingine, kwa makusudi. Maana yake ni kwamba ili mtuhumiwa athibitke
kwamba aliua ni sharti kwanza mwili wa mtu aliyeuawa upatikane, ufanyiwe uchunguzi
na madaktari wenye taaluma hiyo kuthibitisha kilichosababisha kifo chake, na kisha
wataalamu wa masuala ya kijinai wathibitishe kwamba kilichosabaisha kifo hicho
kilitendwa na mtuhumiwa, akiwa na akili timamu, na akifahamu vema matokeo ya
matendo yake.
Kwa hiyo, inawezakana kwamba mtu amekufa kwa kunywa sumu iliyowekwa kwenye
tunda ambalo limepakwa sumu hiyo na jirani yake, na kwamba tunda hilo baada ya
kupakwa sumu liliwekwa mahali pa wazi; halikufichwa.
Iwapo mtuhumiwa atajitetea kwamba alikuwa ametega wadudu waharibifu, kama
panya, na ikathibitika kwamba kweli nyumba hiyo ina panya waharibifu, mahakama
inaweza kumwona hana hatia ya mauaji kwa sababu anakuwa hajakusudia kumwua
mwenzake

Mambo muhimu ya kuzingatia katika somo hili ni haya:
(a) Kila kosa la jinai limeandikwa katika kitabu cha Sheria
(b) Mtu yeyote hataitwa mhalifu mpaka pale atakapothibitika kuwa ametenda kosa la
jinai
(c) Kosa la jinai lazima lithibitike bila kuacha shaka yoyote yenye mashiko
(d) Kosa la jinai lina pande mbili; kutenda jambo lililokatazwa na nia ya kutenda
jambo lililokatazwa
(e) Mwathiriwa wa kosa la jinai ni shahidi wa upande wa mashitaka, si mshitaki
Tukutane katika somo lijalo