DC Jokate aeleza sababu wananchi kuvamia uwanja wa ndege Dar wakimuaga Magufuli

 

DC Jokate aeleza sababu wananchi kuvamia uwanja wa ndege Dar wakimuaga Magufuli

Dar es Salaam. Mkuu wa Wilaya ya Kisarawe, Jokate Mwegelo amesema kundi la wananchi wa Mkoa wa Dar es Salaam waliovamia Uwanja wa Ndege wa Kimataifa wa Julius Nyerere (JNIA) wakati mwili wa aliyekuwa Rais wa Tanzania, John Magufuli ukipakiwa kwenye ndege kuelekea jijini Dodoma ni ishara ya mapenzi waliyokuwa nayo kwa kiongozi huyo.

Jana Jumapili Machi 21, 2021 baada ya mwili huo kuagwa katika uwanja wa Uhuru ulipelekwa JNIA na baadhi ya wananchi waliokuwa wamejipanga kando ya barabara waliingia katika uwanja huo, eneo zinapogeshwa ndege na kuimba wakimsifu Magufuli na wengine kuangua vilio.

Akieleza hali hiyo leo Jumatatu Machi 22, 2021 Jokate kupitia ukurasa wa mtandao wake wa kijamii wa Instagram ameandika, “angalia namna watu wanavyomuomboleza shujaa wao, Dk John Pombe Joseph Magufuli, ‘nimeona nisimame hapa niwasalimu ndugu zangu’. Hii kauli wananchi waliizoea kuisikia kutoka kwako kila unapopita.”

“Leo mioyo yao imepatwa ganzi na simanzi na kujiuliza, why unapita kimya kimya. Wananchi hawa wanyonge hawajaacha desturi uliyowazoesha ya kusimama pembeni ya barabara kukulaki na kukusimamisha, lakini leo wana huzuni kwani shida na kero zao huzisikii. Hawakuoni juu ya gari tena kama walivyozoea. Mwamba umelalala. Nenda JPM uliyekuwa kipenzi cha Watanzania.