Rais Samia aeleza ujumbe aliopewa na Magufuli

 

Rais Samia aeleza ujumbe aliopewa na Magufuli

Dodoma."Samia usiwe na wasiwasi kuhusu afya yangu, nenda kaangalie miradi tuliyoahidi kuwahudumia wananchi peleka salamu zangu waambie ninawapenda,” amesema Rais wa Tanzania, Samia Suluhu Hassan akimnukuu mtangulizi wake, Hayati John Magufuli.

Ameeleza hayo leo Jumatatu Machi 22, 2021 katika uwanja wa Jamhuri mjini Dodoma katika shughuli ya kuaga mwili wa Magufuli aliyefariki dunia Machi 17, 2021 katika hospitali ya Mzena alikokuwa akipatiwa matibabu ya maradhi ya moyo.

Katika hotuba yake Samia alinukuu maneno hayo, akibainisha ndio yalikuwa maelekezo ya mwisho aliyopewa na Magufuli wakati akimuaga kuwa anakwenda katika ziara mkoani Tanga.

“Nilikuwa na ziara ya kwenda Tanga nikampigia simu Magufuli ili kumpa taarifa ya ziara kama ilivyokuwa kawaida,” amesema Samia na kisha kunukuu alichojibiwa na Magufuli ambaye mazishi yake yatafanyika wilayani Chato Mkoa wa Geita Ijumaa Machi 26, 2021.

Kauli hiyo ya Samia ilisababisha watu wengi uwanjani hapo kuangua kilio, hasa kiongozi huyo aliposema hawezi kuisikia, kusoma mwandiko wa Magufuli wala kusikia simu alizokuwa akimpigia na hatoweza tena kushauriana naye.